નિકાસકારોને મોટી રાહત, રૂપિયામાં મળતી નિકાસ આવકને ડોલર-યુરો જેવી FTP સુવિધા

ભારતીય નિકાસકારો માટે સરકારે મહત્વપૂર્ણ નીતિ ફેરફાર કર્યો છે. RBI દ્વારા મંજૂર બેન્કિંગ માધ્યમથી રૂપિયામાં મળતી પાત્ર નિકાસ આવકને હવે Foreign Trade Policy (FTP) હેઠળ ડોલર અને યુરો જેવા મુક્તપણે રૂપાંતરિત થઈ શકતા વિદેશી ચલણમાં મળતી આવક સમાન માન્યતા મળશે. પરિણામે નિકાસકારો આવી રૂપિયા આવક પર FTPના લાભ મેળવી શકશે અને તેને પોતાની નિકાસ જવાબદારીઓ પૂર્ણ કરવા માટે પણ ઉપયોગમાં લઇ શકશે.

FTP 2023માં તાત્કાલિક સુધારો

Directorate General of Foreign Trade (DGFT)એ Foreign Trade Policy 2023માં તાત્કાલિક અસરથી સુધારો કર્યો છે. આ ફેરફારને RBIના Foreign Exchange Management સંબંધિત 2023ના નિયમો સાથે સુસંગત કરવામાં આવ્યો છે. રૂપિયામાં આંતરરાષ્ટ્રીય વેપાર સેટલમેન્ટની સુવિધા નવેમ્બર 2022માં શરૂ કરવામાં આવી હતી. હવે FTPમાં પણ સ્પષ્ટ માન્યતા મળવાથી નિકાસકારો માટે અગાઉ રહેલી અનિશ્ચિતતા દૂર થશે.

રૂપિયા સેટલમેન્ટ વધુ આકર્ષક બની શકે

નવી વ્યવસ્થાથી ભારતીય નિકાસકારો અને વિદેશી ખરીદદારોને ડોલર અથવા અન્ય વિદેશી ચલણ પર સંપૂર્ણ નિર્ભર રહેવાના બદલે રૂપિયામાં વ્યવહાર કરવાની વધુ તક મળશે. રૂપિયામાં ચુકવણી થવાથી કેટલાક વ્યવહારોમાં ચલણ રૂપાંતર ખર્ચ અને વિનિમય દરમાં થતા ઉતાર-ચઢાવનું જોખમ ઘટાડવામાં મદદ મળી શકે છે. ડોલરની અછત અથવા વૈશ્વિક ચુકવણી વ્યવસ્થામાં મુશ્કેલી ધરાવતા દેશો સાથેના વેપારમાં પણ તેનો ઉપયોગ થઈ શકે છે.

મોટા પાયે ઉપયોગ માટે બેન્કિંગ વ્યવસ્થા જરૂરી

રૂપિયા આધારિત વેપારને વ્યાપક બનાવવા માત્ર નીતિ બદલાવ પૂરતો નહીં હોવાનું નિષ્ણાતોનું માનવું છે. વિદેશી ખરીદદારોને સરળતાથી રૂપિયા ઉપલબ્ધ થાય અને વિદેશી બેન્કો પાસે રૂપિયા બેલેન્સના ઉપયોગ, રોકાણ અથવા રૂપાંતર માટે વ્યવહારુ વિકલ્પ હોવા જરૂરી રહેશે. દેશવાર સેટલમેન્ટ વ્યવસ્થા, સરળ બેન્કિંગ પ્રક્રિયા, સસ્તું હેજિંગ અને રૂપિયા આધારિત નિકાસ ધિરાણ જેવી સુવિધાઓ પણ મહત્વપૂર્ણ બની શકે છે.

ACU, નેપાળ અને ભૂટાન માટે અલગ નિયમ

Asian Clearing Union હેઠળ આવતા દેશો તેમજ નેપાળ અને ભૂટાન સાથેના વ્યવહારો માટે હાલની અલગ જોગવાઈઓ યથાવત રહેશે.