રૂપિયાને વૈશ્વિક ઓળખ અપાવવા ભારતનો મોટો પ્લાન, વિદેશ વેપાર નીતિમાં મોટા ફેરફારોની તૈયારી

ભારતીય રૂપિયામાં આંતરરાષ્ટ્રીય વેપારને પ્રોત્સાહન આપવા Foreign Trade Policyમાં મહત્વપૂર્ણ ફેરફાર કરવામાં આવ્યો છે. હવે અધિકૃત બેન્કિંગ માધ્યમથી રૂપિયામાં મળતી પાત્ર નિકાસ ચુકવણીને FTP હેઠળ વિદેશી ચલણમાં મળતી આવક સમાન માન્યતા મળશે. તેના કારણે નિકાસકારો આવી આવક પર નીતિ હેઠળના લાભ મેળવી શકશે અને તેને નિકાસ સંબંધિત જવાબદારીઓ પૂર્ણ કરવા માટે પણ ગણાવી શકશે.

રૂપિયા આધારિત વેપારને પ્રોત્સાહન

DGFTના સુધારાથી ભારતીય નિકાસકારો માટે વિદેશી ગ્રાહકોને રૂપિયામાં બિલ બનાવવું અને ચુકવણી સ્વીકારવી વધુ સરળ બનશે. સરકારી અધિકારીના જણાવ્યા મુજબ આ ફેરફાર Foreign Trade Policyને હાલના FEMA માળખા સાથે વધુ સુસંગત બનાવે છે અને આંતરરાષ્ટ્રીય વેપાર સેટલમેન્ટમાં રૂપિયાના ઉપયોગ માટે વધુ સ્પષ્ટતા આપે છે.

Export obligationમાં પણ ગણાશે ચુકવણી

નેપાળ અને ભૂટાન સિવાયના દેશોમાં કરવામાં આવેલી નિકાસ માટે જો ચુકવણી નક્કી કરાયેલા બેન્કિંગ માધ્યમથી ભારતીય રૂપિયામાં મળે, તો તેને FTP હેઠળ નિકાસ લાભ મેળવવા માટે પાત્ર માનવામાં આવશે. આવી ચુકવણીને વિદેશી ચલણમાં મળતી પાત્ર આવકની જેમ export obligation પૂર્ણ કરવામાં પણ ગણવામાં આવશે.

કરન્સી પસંદગીમાં વધુ સરળતા

નવી વ્યવસ્થાથી ભારતીય નિકાસકારો અને તેમના વિદેશી વેપારી ભાગીદારોને બિલિંગ અને ચુકવણી માટે ચલણ પસંદ કરવામાં વધુ સરળતા વધશે . રૂપિયામાં કાયદેસર રીતે મળતી નિકાસ આવકને માત્ર ચલણના કારણે FTP લાભથી વંચિત રહેવું નહીં પડે, જેના કારણે રૂપિયા આધારિત સેટલમેન્ટ વધુ ઉપયોગી બની શકે છે.

રૂપિયા ખાતામાં થવી પડશે ચુકવણી

રૂપિયામાં મળતી ચુકવણી ભારત બહાર રહેતા વ્યક્તિઓના માન્ય Indian Rupee accountsમાં જમા થવી જરૂરી રહેશે. આવા ખાતા FEMAના લાગુ નિયમો હેઠળ ખુલેલા હોવા જોઈએ.